Berubah tauka pulai baka selama?

FB: Unggal Rantai Naga

Sekeda tanya ti patut disaut kitai empu lebuh maia berpilih tu.

1. Kitai masuk gerempong Malaysia taun 1963. Reti nya, nyau deka 50 taun kitai merintah menua diri, ukai agi dipegai ribai, ukai mega dipegai Malaya. Nama kebuah kitai agi berandau pasal nadai api, nadai ai, nadai jalai raya?. Taja pan semua nya semina basic amenities, perintah ti megai perintah kitai ngelama tu, enda ulih mai semua pemansang nya. Sanggup kitai nganti 50 taun da? Enti meda pengelama sida perintah bejaku ka 'politik pembangunan' nyau deka setengah abad, peda meh gaya “pemansang” ti diberi sida. Nama patut digaga kitai deh? Majak milih sida, tauka nguji ka pengari bukai?

2. Kitai bela nemu pengawa bala tuai menua Sarawak, sereta tuai kitai Iban mega. Enda iboh aku nusoi panjai agi, laban semua utai nya maioh udah dibantai ba macham bengkah website. Kitai mega nemu pengawa sida endang salah, nguna kuasa ti diberi rakyat ka sida kena ngumpul pengeraja dunya ka diri empu sereta kroni sida. Nama meh kebuah kitai majak ngasuh orang ti endang ditemu enda ulih dikarap ka agi, sereta terang-terang ngerumpak asil menua kitai, nyadi perintah kitai?

3. Nyadi di Semenanjung, orang ti nadai tanah, diberi tanah ngambi ka bisi endur bertanam bertupi, nanam sawit, nanam getah. Semua sida diberi benih sawit, paong getah, lalu skim nya digaga ka perintah jalai raya, diberi api, ai sereta mega diberi perengka kena berumah. Nama kebuah perintah menua kitai, enda ulih meri katan/allocation dikena nyaup rakyat ti endang sigi bempu ka tanah, ngemansang ka tanah sida empu? Nama meh enda tau enda berkunsi ka tanah kitai enggau kompeni baru perintah ka ngemansang ka tanah kitai?

4. Tiap kali udah semak maia berpilih, perintah lalu announce maioh macham projek. Maioh bengkah meh nilai projek, munyi ko sida ka tuai, peneka nyebut. Bisi sekeda projek mit, ti diberi terus e.g. atap 10 singkap sepintu, baja 8 kambut, anak manuk 20 iko, sereta duit ringgit RM200 sepintu. Lalu kitai mega dipadah, enti kitai terus ngundi sida, maioh agi, sereta besai agi, projek ti deka diberi. Udah abis berpilih, lalu ga nadai didinga rita projek. Ba menua kitai di Machan, lama bendar udah ninga bisi plan ka ngaga jambatan meraka Sg Kanowit, sereta jalai datai ke Ulu Machan, ngambi ka semua raban ti diau ba seberai pasar baka bala di Matau, Sg Latong enggau Sg Machan ulih ngena jalai darat datai ba pala tangga. Semaia tu disebut belama lebuh maya berpilih, tang udah tembu berpilih, lalu nadai didinga berita. Munyi ka salah jako, sunyi agi ari Nanga Sebelian, ti endur niang aki-ini kitai nyangkai ka diri belama-lama iya. Sekali tu, agi ka enda kitai andal ka jako sida?

Pengujong bendar, undi genap iko kitai berega amat. Nya kebuah genap iko kitai ti ulih pulai maia berpilih tu ila, bela pulai magang. Enti sema enda ulih pulai, kitai patut bertalipon engau bala apai-indai, bala menyadi, bala kaban belayan suku juru enggau semua orang ti dikelala kitai. Terang ka sida enggau silik utai ti nyadi ba serata menua, awak ka sida enda semina ninga ari mainstream media (surat khabar, RTM, TV3).

Pia mega, lebuh maia berpilih tu, enda ulih kelari ka bersengki penemu, laban kitai mensia endang nadai sebaka runding 100% . Taja pia, semua utai tu enda patut nyadi ka penyarut. Kitai ti rebak baru, patut ulih berunding enggau berkereja ngena chara baru, enggai ka kitai majak berpechah. Lebuh ti berkempen, jaga meh leka jaku, laban jaku ti badas, datai ari ati ti badas.

Anembiak Latong Rebak Baru