Dini-dini menua ke bisi alai sangkai dimenua Sarawak enda nemu nadai ga berita bekaul enggau tanah adat kitai bangsa (NCL). Pansut ba blog pasal tanah ke diambi dikena nuduk ke "Pemansang" kenu ko berita. Pia mega baka rumah Nor Anak Nyawai, nyau dirarak. Tang meh aku bisi berasai iran mimit,nama kebuah berita tu nadai nyengala pansut dalam tv? TV1,TV2 & TV3?
Mina ba dalam blog ke bisi nerang utai kenyadi bakatu. Pia mega aku alit ati, bakani ko company ti sebali ari enda temu penatai nyau tau beempu tanah serta bisi hak nuduk ke bisness ke dikumbai "PEMANSANG" ba tanah adat kitai dayak. Patut ke enda kompeni tu disalah? Tang ba penemu aku tentu iya bisi orang ngeluar ke geran tauka lisen ke sida tu, mai sida berani ngambu, berani nujah tanah bangsa kitai. Bah sapa orang tu deh?
Ti dilaban sida lalu nujuk ke surat ti ngesah ke area nya udah dibeli sida, endang milik sida. Makin ari nyau maioh amat kes ke bansa tu nyadi, kitai dayak nyau belaya enggau tanah diri empu, bechara enggau tanah diri empu ngelaban orang ke sebubu ari enda temu penatai.
Ti kitai nganjung peminta nyukat tanah, maioh amat ke dalih sida Jabatan Ukur/Land and survey. Enda ulih sukat setegal nya tanah adat, enda ulih beri permit laban tanah adat. Tang kati ko company tau bulih permit?? Nama beza sida iya enggau bangsa dayak??
Ka ngaga "PEMANSANG" ba siti-siti menua nadai salah. Endang disampi ke "PEMANSANG" datai, tang meh enggau patut. Anang kelalu enda bebasa ke bangsa dayak,anang kelalu kurang ajar enggau bangsa dayak. Ditu ukai ka be jai perintah, tang meh enda setuju enggau utai ti dikereja sida pemesai ti bekereja ba perintah. Enda besangkut paut enggau sapa-sapa ke makai suap ba dini-dini alai, tang meh anang ngambi tanah dayak sepeneka ati.Laban setegal land code ti salah guna tuai menua kitai nya meh kebendar amat ngenusah bangsa kitai dayak. Land code kena ngambi tanah kitai, udah nya diberi ngagai tauke-tauke besai,ngagai bala-bala ti bisi kaul dikena bejalai ke bisness. Tang meh kitai dayak ke be empu tanah mina pesap-pesap,mina dibayar pampas "BELAS KASIHAN" tauka "KENA NGUDAH".
Nya alai ngagai kaban bangsa dayak, berunding meh bala kitai semua bakani cara kitai deka ngetan ke tanah adat kitai ari ti diambi orang,kelebih agi bala company kaya ti deka bebuka ke ladang. Anang enda angkun ke tanah serta menua diri, anang alah laban keremba serta jako sebubu ngapa sebelah kaki lima. Kasih ke anak,uchu kitai jemah enggai ke nyadi kampar dimenua diri empu laban ti nadai setempap tanah alai beridup.
Anang nganti pagila, anang nganti ila. Mupuk meh kitai bela berunding,badu agi ngembuan ati bingking. Ngagai sida ke bisi pemandai serta bisi nemu bekaul enggau tanah NCL kitai dayak nadai salah meri penemu,lalau serta jalai ulih mutar ke penanggul ke udah lama nuntung bangsa kitai.
"Conclusion"
I’m a Dayak Iban and I have the right to vote. My vote count:-
1)My vote nominates
2)My vote pay good services;
3)My vote create opportunities and growth
4)My vote safeguard my Native Rights;
5)My vote preserved justice;
6)My vote is my future generation benefits;
7)My vote is my bond (Voice, Opportunity, Trust & Equity).
By: Anembiak Latong Rebak Baru
No comments:
Post a Comment