Tanah Adat Bansa Dayak (NCR)

Pengawa Besukat Ketanah Adat enggau Penanggul

Kena 19th Dec 2011, tu kemari Borneo Post Online bisi ngayan ke berita bekaul enggau pekara besukat ke tanah Adat Bansa Asal (NCR).Ti bisi nyebut dikembuan kurang lebih 3,329 iko bansa Kayan,Kenyah (Dayak)di Long Aton,Tinjar enggau pemesai 1,207 hektar.Pemesai tanah enggau survey (JTS) madah deka besukat ke tanah Adat Bansa Dayak ngena cara Inisiatif Baru NCR.

Nemunya bakani ko gaya iya diatu, sekali ke udah di sukat tauka agi benung dalam "proses"? Sama-sama meh kitai ninga,serta berati ke bakani ko pengujung pengawa tu ila. Arap-arap ke mujur meh.

Tang bakani ko enggi bala kami di menua Kanowit, kelebih agi area Machan?
Puas endar ga bala sida ketuai,pia mega bala ke nemu senentang pekara tu nganjung "proposal" tauka peminta nyukat tanah tang lalu apin bisi saut jauh ke disukat. KDC nyau ka tiap taun ga minta bayar cukai pintu,cukai rumah. Kapa ga nya ukai nya maioh ga cukai dipinta sida, tang aku agi enda entu nemu nama tuju cukai enti sema rumah kitai agi beduduk ba tanah ke empai bisi permit taja pan nya tanah kitai empu, tau dikumbai tanah haram.
Ribu iya hektar sema jako tanah pelilih Machan, nama kebuah mina tanah cina aja bisi geran,bisi pala?? Tanah cina tengah-tengah tanah iban tau bisi pala,bisi permit tang belabuh ari kanowit ke Machan nyau ka semua tanah iban, maioh agi ke nadai permit,nadai pala.? Ukai nyalah cina, anang saru. Tang meh alit ati enggau utai ke nyadi,enggau permit ke dikeluar ka Land & survey.

Pia mega taun nyin kemari,maioh bala tekenyit ati. Laban bisi raban ari Kuching/semenanjung minta anjung meresa tanah sida tungga ke menua Ulu Latong nengah jala Camp Batang Ng. Machan. Kati ko sida tu tau ngumbai diri bisi tanah ke ulu Latong, nyau empega/seredah tang meh anang saru laban utai tu amat nyadi. Enda nemu kemaia tang sigi datai serta mai penanggul ngagai bala kaban belaian ke bisi dunya menua di Ulu Latong. Kati ko Titanium serta bisi dua tiga iti company tau bisi area ke Ulu Latong (ditemu dalam Map). Kemaia aki ine sida enggau berimba dunya menua kin? Ari ni sida tu bulih pemendar?

Ngelamatu Tanah Adat Bansa Dayak Mina di tanda ka ngena sungai,munggu, tinting. Tang diatu, kemanah agi ti ulih baum meh kitai nganjung peminta bebala maioh minta nyukat tanah adat kitai ngambi ke bisi bukti nya endang enggi kitai serta enda mudah dirompak,dirampas orang ngapa.

"Nothing can be done by talk,unless we effort to do it with find out the solution and then plan how we sorted this such of thing.We're not cheat anybody,we're not rob anybody,we're not grab land those belong to somebody but we're try to protect our own land."


Nya alai ngagai bala kaban belaian ari Latong ke bisi Macha artikel aku ditu arap ke kita tau ngadang-ngadang meh. Kada ke empai laun,kada ke empai nyadi manah agi kitai sedia dulu.

By: Anembiak Latong Rebak Baru.